ಭೂಪಾಲ್, ಏಪ್ರಿಲ್ 10: ಮಧ್ಯಪ್ರದೇಶದ ಸೀಹೋರ್ ಜಿಲ್ಲೆಯಲ್ಲಿ ಭಕ್ತರು ತಮ್ಮ ಹರಕೆ ಈಡೇರಿದ ಹಿನ್ನೆಲೆಯಲ್ಲಿ ಪವಿತ್ರ ನರ್ಮದಾ ನದಿಗೆ ಸುಮಾರು 11,000 ಲೀಟರ್ ಹಾಲನ್ನು ನೇರವಾಗಿ ಸುರಿದ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಮತ್ತು ಆಕ್ರೋಶಕ್ಕೆ ಕಾರಣವಾಗಿದೆ.
ಸೀಹೋರ್ ಜಿಲ್ಲೆಯ ಭೇರುಂದಾ ತಾಲೂಕಿನ ಪಾತಾಳೇಶ್ವರ ಮಹಾದೇವ ದೇವಸ್ಥಾನದಲ್ಲಿ ಕಳೆದ 21 ದಿನಗಳಿಂದ ವಿಶೇಷ ಮಹಾಯಜ್ಞ ನಡೆಯುತ್ತಿತ್ತು. ಈ ಮಹಾಯಜ್ಞದ ಸಮಾರೋಪದ ಅಂಗವಾಗಿ ಹಾಗೂ ಭಕ್ತರ ಹರಕೆ ಪೂರೈಸುವ ಸಲುವಾಗಿ ಬುಧವಾರ ಭಾರೀ ಪ್ರಮಾಣದಲ್ಲಿ ‘ದುಗ್ಧಾಭಿಷೇಕ’ ಕಾರ್ಯಕ್ರಮ ಆಯೋಜಿಸಲಾಯಿತು. ಟ್ಯಾಂಕರ್ಗಳ ಮೂಲಕ ಸಾವಿರಾರು ಲೀಟರ್ ಹಾಲನ್ನು ನರ್ಮದಾ ನದಿಗೆ ಹರಿಸಲಾಗಿದ್ದು, ಕೆಲಕಾಲ ನದಿಯ ನೀರು ಸಂಪೂರ್ಣ ಬಿಳಿ ಬಣ್ಣಕ್ಕೆ ತಿರುಗಿದ ದೃಶ್ಯಗಳು ವೈರಲ್ ಆಗಿವೆ.
ಅಂದಾಜು ಪ್ರಕಾರ, ನದಿಗೆ ಸುರಿದ 11,000 ಲೀಟರ್ ಹಾಲಿನ ಮೌಲ್ಯವು ಸುಮಾರು 5.5 ಲಕ್ಷದಿಂದ 7.7 ಲಕ್ಷ ರೂಪಾಯಿಗಳವರೆಗೆ ಇರಬಹುದು ಎಂದು ತಿಳಿದುಬಂದಿದೆ. ಇಷ್ಟು ದೊಡ್ಡ ಪ್ರಮಾಣದ ಹಾಲನ್ನು ವ್ಯರ್ಥ ಮಾಡುವ ಬದಲು ಬಡ ಮಕ್ಕಳಿಗೆ ಅಥವಾ ಅನಾಥಾಶ್ರಮಗಳಿಗೆ ನೀಡಬಹುದಿತ್ತು ಎಂಬ ಅಭಿಪ್ರಾಯಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ.
ಪರಿಸರವಾದಿಗಳ ಪ್ರಕಾರ, ನದಿಗೆ ಇಷ್ಟು ಪ್ರಮಾಣದ ಹಾಲು ಸುರಿಸುವುದರಿಂದ ನೀರಿನಲ್ಲಿನ ಆಮ್ಲಜನಕದ ಮಟ್ಟ (BOD) ಕುಸಿಯುವ ಸಾಧ್ಯತೆ ಇದೆ. ಇದರಿಂದ ಜಲಚರ ಜೀವಿಗಳಿಗೆ ಹಾನಿಯಾಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ.
ಈ ಘಟನೆಗೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಸ್ಥಳೀಯ ಜಿಲ್ಲಾಡಳಿತವು ಮಾಹಿತಿ ಸಂಗ್ರಹಿಸಲು ಮುಂದಾಗಿದೆ. ಅನೇಕರು “ಧರ್ಮ ಮತ್ತು ಭಕ್ತಿ ಸಮಾಜಮುಖಿಯಾಗಿರಬೇಕು, ಇಂತಹ ವ್ಯರ್ಥ ಪ್ರದರ್ಶನಕ್ಕೆ ಅಲ್ಲ” ಎಂದು ಟೀಕಿಸುತ್ತಿದ್ದಾರೆ. “ನೂರಾರು ಕುಟುಂಬಗಳಿಗೆ ಸಾಕಾಗುವಷ್ಟು ಹಾಲನ್ನು ನದಿಗೆ ಸುರಿಯುವುದು ಯಾವ ಸಂಪ್ರದಾಯ?” ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
ಇನ್ನೊಂದೆಡೆ, ದೇವಸ್ಥಾನದ ಆಯೋಜಕರು ಇದು ತಲೆತಲಾಂತರಗಳಿಂದ ಬಂದಿರುವ ನಂಬಿಕೆ ಹಾಗೂ ನರ್ಮದಾ ಮಾತೆಗೆ ಅರ್ಪಿಸುವ ಕಾಣಿಕೆ ಎಂದು ತಮ್ಮ ಕ್ರಮವನ್ನು ಸಮರ್ಥಿಸಿಕೊಂಡಿದ್ದಾರೆ.
