ಜಪಾನ್ ಅಮೋರಿ ಪ್ರಾಂತ್ಯದ ಕರಾವಳಿಯಲ್ಲಿ ಸ್ಥಳೀಯ ಸಮಯ ಬೆಳಿಗ್ಗೆ 11.44 ಕ್ಕೆ 20 ಕಿ.ಮೀ ಆಳದಲ್ಲಿ 6.7 ತೀವ್ರತೆಯ ಭೂಕಂಪ ಸಂಭವಿಸಿದೆ. ಜಪಾನ್ ಹವಾಮಾನ ಸಂಸ್ಥೆಯು ಸುನಾಮಿ ಎಚ್ಚರಿಕೆಯನ್ನು ನೀಡಿದೆ.
ಇಲ್ಲಿಯವರೆಗೆ ಯಾವುದೇ ಸಾವುನೋವುಗಳು ಅಥವಾ ಆಸ್ತಿ ಹಾನಿಯ ವರದಿಗಳು ಬಂದಿಲ್ಲ. ಭೂಕಂಪದಿಂದ ಯಾವುದೇ ಸುನಾಮಿ ಹಾನಿಯನ್ನು ನಿರೀಕ್ಷಿಸಲಾಗಿಲ್ಲ ಎಂದು ಜೆಎಂಎ ಹೇಳಿದೆ.
ಪ್ರಾಥಮಿಕವಾಗಿ 6.5 ತೀವ್ರತೆಯನ್ನು ಅಂದಾಜಿಸಲಾಗಿತ್ತು, ನಂತರ ಇದನ್ನು ಜೆಎಂಎ 6.7 ಕ್ಕೆ ನವೀಕರಿಸಿತು. ಜಪಾನ್ನ 1-7 ಭೂಕಂಪನ ತೀವ್ರತೆಯ ಮಾಪಕದಲ್ಲಿ ತೀವ್ರತೆಯನ್ನು 4 ಎಂದು ಅಳೆಯಲಾಯಿತು.
ಜಪಾನ್ನ ಹೋಕೈಡೋ, ಆಮೋರಿ, ಇವಾಟೆ ಮತ್ತು ಮಿಯಾಗಿ ತೀರ ಪ್ರದೇಶಗಳಿಗೆ 1 ಮೀಟರ್ ಎತ್ತರದ ಸುನಾಮಿ ಅಲೆಗಳು ಸಂಭವಿಸುವ ಸಾಧ್ಯತೆ ಹಿನ್ನೆಲೆಯಲ್ಲಿ ಜನರನ್ನು ಕಡಲ ತೀರದಿಂದ ದೂರ ಇರಲು ಸೂಚಿಸಲಾಗಿದೆ. ಭೂಕಂಪದ ನಂತರ ಇನ್ನಷ್ಟು ಕಂಪನಗಳು ಸಂಭವಿಸಬಹುದೆಂಬ ಮುನ್ನೆಚ್ಚರಿಕೆಯನ್ನು ಅಧಿಕಾರಿಗಳು ನೀಡಿದ್ದಾರೆ.
ವಾರದ ಆರಂಭದಲ್ಲೇ ಇದೇ ಪ್ರದೇಶದಲ್ಲಿ ಸಂಭವಿಸಿದ 7.5 ಮಾಗ್ನಿಟ್ಯೂಡ್ ಭೂಕಂಪನದ ನಂತರ ಇದು ಮತ್ತೊಂದು ದೊಡ್ಡ ಕಂಪನವಾಗಿದ್ದು, ಸ್ಥಳೀಯ ಜನರಲ್ಲಿ ಆತಂಕ ಹೆಚ್ಚಿಸಿದೆ. ಪ್ರಾಥಮಿಕ ವರದಿಗಳ ಪ್ರಕಾರ ಹೆಚ್ಚಿನ ಹಾನಿ ಅಥವಾ ಪ್ರಾಣಹಾನಿ ವರದಿಯಾಗಿಲ್ಲ. ಆದಾಗ್ಯೂ, ತೀರ ಪ್ರದೇಶಗಳಲ್ಲಿ ರಕ್ಷಣಾ ಸಿಬ್ಬಂದಿ ಮತ್ತು ಪೊಲೀಸ್ ತಂಡಗಳನ್ನು ನಿಯೋಜಿಸಲಾಗಿದೆ.
ಸುನಾಮಿ ಎಚ್ಚರಿಕೆ ಮುಂದುವರಿದಿರುವುದರಿಂದ ನಿವಾಸಿಗಳಿಗೆ ಎಚ್ಚರಿಕೆಯಿಂದ ಇರಲು, ಅಧಿಕೃತ ಸೂಚನೆಗಳನ್ನು ಅನುಸರಿಸಲು ಅಧಿಕಾರಿಗಳು ಸಲಹೆ ನೀಡಿದ್ದಾರೆ.
