ಬೆಂಗಳೂರು: ರಾಜ್ಯದ ಸರ್ಕಾರಿ ಶಾಲೆಗಳ ಶಿಕ್ಷಕರಿಗೆ ಸರ್ಕಾರ ಭರ್ಜರಿ ಸಿಹಿ ಸುದ್ದಿ ನೀಡಿದೆ. ದಶಕಗಳ ಹಳೆಯ ನಿಯಮಗಳಿಗೆ ಕೊಕ್ ನೀಡಿ, ಸಹ ಶಿಕ್ಷಕರಿಗೆ ಪ್ರಮೋಷನ್ ಮೂಲಕ ಮುಖ್ಯ ಶಿಕ್ಷಕರ (ಹೆಡ್ಮಾಸ್ಟರ್) ಪಟ್ಟ ನೀಡಲು ರಾಜ್ಯ ಸರ್ಕಾರ ತೀರ್ಮಾನಿಸಿದೆ. ಇದರೊಂದಿಗೆ ಪದವೀಧರ ಶಿಕ್ಷಕರಿಗೂ ಬಡ್ತಿ ಭಾಗ್ಯ ದೊರೆಯಲಿದೆ.
ಶಿಕ್ಷಣ ಸಚಿವ ಮಧುಬಂಗಾರಪ್ಪ ಅವರು ಈ ಕುರಿತು ಮಹತ್ವದ ತೀರ್ಮಾನ ಕೈಗೊಂಡಿದ್ದು, ಶಿಕ್ಷಕರ ರೇಶಿಯೋ ಆಧಾರದ ಮೇಲೆ ಪ್ರಮೋಷನ್ ನೀಡಲು ಶಿಕ್ಷಣ ಇಲಾಖೆ ಮುಂದಾಗಿದೆ. ರಾಜ್ಯದಲ್ಲಿ ಖಾಲಿಯಿರುವ ಸುಮಾರು 9 ಸಾವಿರ ಮುಖ್ಯ ಶಿಕ್ಷಕರ ಹುದ್ದೆಗಳನ್ನು ಪ್ರಮೋಷನ್ ಮೂಲಕ ಭರ್ತಿ ಮಾಡಲು ಸರ್ಕಾರ ನಿರ್ಧರಿಸಿದೆ.
ಕಳೆದ ನಾಲ್ಕು ವರ್ಷಗಳಿಂದ ಮುಖ್ಯ ಶಿಕ್ಷಕರಿಗೆ ಬಡ್ತಿ ನೀಡದೇ ಇದ್ದ ಸರ್ಕಾರ, ಇದೀಗ ಗ್ಯಾರಂಟಿ ಸರ್ಕಾರದ ಭರವಸೆಯಂತೆ ಮೇಸ್ಟ್ರುಗಳಿಗೆ ಬಡ್ತಿ ಭಾಗ್ಯ ನೀಡಲು ಸಜ್ಜಾಗಿದೆ. ಈ ನಿರ್ಧಾರದಿಂದ ಶಾಲೆಗಳ ಆಡಳಿತ ಬಲపడಲಿದ್ದು, ಶಿಕ್ಷಕರಲ್ಲಿ ಹೊಸ ಉತ್ಸಾಹ ಮೂಡಲಿದೆ.
ಶೀಘ್ರದಲ್ಲೇ ಈ ಕುರಿತು ಅಧಿಕೃತ ಆದೇಶ ಹೊರಬೀಳುವ ನಿರೀಕ್ಷೆಯಿದ್ದು, ರಾಜ್ಯದ ಸಾವಿರಾರು ಶಿಕ್ಷಕರು ಸರ್ಕಾರದ ಈ ತೀರ್ಮಾನವನ್ನು ಸ್ವಾಗತಿಸಿದ್ದಾರೆ.
