ಬೆಂಗಳೂರು: ನಗರದ ಜನತೆಗೆ ಮತ್ತೊಮ್ಮೆ ಮೆಟ್ರೋ ಪ್ರಯಾಣದ ದರ ಏರಿಕೆಯ ಬಿಸಿ ತಟ್ಟಲಿದೆ. ಒಂದು ವರ್ಷದ ಹಿಂದಷ್ಟೇ 71.5%ರಷ್ಟು ಭಾರೀ ದರ ಏರಿಕೆ ಮಾಡಿದ್ದ ಬೆಂಗಳೂರು ಮೆಟ್ರೋ ರೈಲು ಕಾರ್ಪೋರೇಷನ್ ಲಿಮಿಟೆಡ್ (BMRCL), ಇದೀಗ ಮತ್ತೆ 5%ರಷ್ಟು ಪ್ರಯಾಣ ದರ ಹೆಚ್ಚಳ ಮಾಡಲು ನಿರ್ಧರಿಸಿದೆ.
ಬಿಎಂಆರ್ಸಿಎಲ್ ಪ್ರತಿ ವರ್ಷ 5%ರಷ್ಟು ದರ ಹೆಚ್ಚಳ ಮಾಡಬಹುದೆಂದು ದರ ನಿಗದಿ ಸಮಿತಿ (FFC) 2025ರಲ್ಲಿ ಶಿಫಾರಸು ಮಾಡಿತ್ತು. ಈ ಹಿನ್ನೆಲೆಯಲ್ಲಿ ಎರಡು ದಿನಗಳ ಹಿಂದೆ ನಡೆದ ಬಿಎಂಆರ್ಸಿಎಲ್ ಮಂಡಳಿ ಸಭೆಯಲ್ಲಿ ಚರ್ಚೆ ನಡೆಸಿ, 5% ದರ ಹೆಚ್ಚಳಕ್ಕೆ ಅನುಮೋದನೆ ನೀಡುವಂತೆ ರಾಜ್ಯ ಸರ್ಕಾರಕ್ಕೆ ಪ್ರಸ್ತಾವ ಸಲ್ಲಿಸಲಾಗಿತ್ತು.
ಈ ಪ್ರಸ್ತಾವಕ್ಕೆ ಸೋಮವಾರ (ಫೆ.2) ಕರ್ನಾಟಕ ಸರ್ಕಾರ ಅನುಮೋದನೆ ನೀಡಿದ್ದು, ಹೊಸ ದರಗಳು ಮುಂದಿನ ಸೋಮವಾರ (ಫೆ.9)ದಿಂದ ಜಾರಿಗೆ ಬರಲಿವೆ. ಇದರಂತೆ ಕನಿಷ್ಠ 1 ರೂ.ದಿಂದ ಗರಿಷ್ಠ 5 ರೂ.ವರೆಗೆ ದರ ಹೆಚ್ಚಳವಾಗಲಿದೆ. ಕನಿಷ್ಠ 10 ರೂ. ಇದ್ದ ಪ್ರಯಾಣ ದರ 11 ರೂ.ಗೆ, ಗರಿಷ್ಠ 90 ರೂ. ಇದ್ದ ದರ 95 ರೂ.ಗೆ ಏರಲಿದೆ.
ಕಳೆದ ವರ್ಷ ದರ ನಿಗದಿ ಸಮಿತಿ 51.55%ರಷ್ಟು ದರ ಹೆಚ್ಚಳಕ್ಕೆ ಶಿಫಾರಸು ಮಾಡಿದ್ದರೂ, ಬಿಎಂಆರ್ಸಿಎಲ್ 101.5%ರಷ್ಟು ದರ ಏರಿಕೆ ಮಾಡಿ 2025ರ ಫೆ.9ರಂದು ಜಾರಿಗೆ ತಂದಿತ್ತು. ಇದಕ್ಕೆ ಸಾರ್ವಜನಿಕ ವಲಯದಲ್ಲಿ ಭಾರೀ ವಿರೋಧ ವ್ಯಕ್ತವಾಗಿದ್ದು, ಪ್ರಯಾಣಿಕರ ಸಂಖ್ಯೆ ಏಕಾಏಕಿ ಕುಸಿತ ಕಂಡಿತ್ತು. ಪರಿಣಾಮ ನಾಲ್ಕು ದಿನಗಳ ಬಳಿಕ ದರವನ್ನು 30%ರಷ್ಟು ಇಳಿಸಲು ಬಿಎಂಆರ್ಸಿಎಲ್ ಮುಂದಾಗಿತ್ತು. ಇದೀಗ ಮತ್ತೆ ದರ ಏರಿಕೆ ಘೋಷಣೆಯಾಗಿರುವುದರಿಂದ, ಪ್ರಯಾಣಿಕರಲ್ಲಿ ಅಸಮಾಧಾನ ವ್ಯಕ್ತವಾಗುವ ಸಾಧ್ಯತೆ ಇದೆ.
