ಮೆಕ್ಸಿಕೋ ಸಿಟಿ, ಫೆಬ್ರವರಿ 23: ದೇಶದ ವಿವಿಧ ಭಾಗಗಳಲ್ಲಿ ಹಿಂಸಾಚಾರದ ಅಲೆಯನ್ನು ಹುಟ್ಟುಹಾಕಿದ ಭಾರೀ ಸೈನಿಕ ಕಾರ್ಯಾಚರಣೆಯಲ್ಲಿ ಪ್ರಬಲ ಮಾದಕವಸ್ತು ದೊರೆ ನೆಮೆಸಿಯೊ ಒಸೆಗುರಾ ಸೆರ್ವಾಂತೆಸ್ ಅಲಿಯಾಸ್ ‘ಎಲ್ ಮೆಂಚೊ’ ಹತ್ಯೆಯಾಗಿದ್ದಾನೆ ಎಂದು ಮೆಕ್ಸಿಕನ್ ಸೇನೆ ಪ್ರಕಟಿಸಿದೆ.
ಜಲಿಸ್ಕೊ ರಾಜ್ಯದ ಟಪಲ್ಪಾ ಪಟ್ಟಣದಲ್ಲಿ ಸೈನಿಕರೊಂದಿಗೆ ನಡೆದ ಘರ್ಷಣೆಯಲ್ಲಿ 59 ವರ್ಷದ ಒಸೆಗುರಾ ಗಂಭೀರವಾಗಿ ಗಾಯಗೊಂಡಿದ್ದಾನೆ. ನಂತರ ಚಿಕಿತ್ಸೆಗಾಗಿ ಮೆಕ್ಸಿಕೋ ಸಿಟಿಗೆ ಕರೆದೊಯ್ಯುವ ವೇಳೆ ಸಾವನ್ನಪ್ಪಿದ್ದಾನೆ ಎಂದು ಸೇನೆ ಹೇಳಿಕೆಯಲ್ಲಿ ತಿಳಿಸಿದೆ. ಆತ ಜಲಿಸ್ಕೊ ನ್ಯೂ ಜನರೇಷನ್ ಕಾರ್ಟೆಲ್ (CJNG) ಸಂಘಟನೆಯ ಮುಖ್ಯಸ್ಥನಾಗಿದ್ದನು.
ದಾಳಿಗೆ ಪ್ರತೀಕಾರವಾಗಿ ಬಂದೂಕುಧಾರಿಗಳು ಪಶ್ಚಿಮ ಜಲಿಸ್ಕೊ ರಾಜ್ಯದಲ್ಲಿ 20ಕ್ಕೂ ಹೆಚ್ಚು ರಸ್ತೆಗಳನ್ನು ತಡೆದಿದ್ದು, ಟಪಲ್ಪಾ ಸೇರಿದಂತೆ ಹಲವೆಡೆ ಕಾರುಗಳು ಹಾಗೂ ಟ್ರಕ್ಗಳಿಗೆ ಬೆಂಕಿ ಹಚ್ಚಲಾಗಿದೆ. ಹಿಂಸಾಚಾರ ಇತರ ರಾಜ್ಯಗಳಿಗೂ ವಿಸ್ತರಿಸಿದ್ದು, ಪರಿಸ್ಥಿತಿ ಉದ್ವಿಗ್ನವಾಗಿದೆ.
ಮೆಕ್ಸಿಕನ್ ಅಧ್ಯಕ್ಷೆ ಕ್ಲೌಡಿಯಾ ಶೀನ್ಬಾಮ್ ನಾಗರಿಕರು ಶಾಂತವಾಗಿರಲು ಮನವಿ ಮಾಡಿದ್ದಾರೆ. ಕೇಂದ್ರ ಸರ್ಕಾರವು ರಾಜ್ಯ ಅಧಿಕಾರಿಗಳೊಂದಿಗೆ ಸಮನ್ವಯ ಸಭೆ ನಡೆಸುತ್ತಿದೆ ಎಂದು ಅವರು ತಿಳಿಸಿದ್ದಾರೆ.
‘ಎಲ್ ಮೆಂಚೊ’ ಎಂದೇ ಕುಖ್ಯಾತಿ ಗಳಿಸಿದ್ದ ಒಸೆಗುರಾ, ಸಿನಾಲೋವಾ ಕಾರ್ಟೆಲ್ ಸಂಸ್ಥಾಪಕರಾದ ಜೋಕ್ವಿನ್ ಗುಜ್ಮಾನ್ ಹಾಗೂ ಇಸ್ಮಾಯಿಲ್ ಜಾಂಬಾಡಾ ಬಂಧನದ ನಂತರ ಮೆಕ್ಸಿಕೋದ ಅತಿದೊಡ್ಡ ಡ್ರಗ್ ಲಾರ್ಡ್ಗಳಲ್ಲಿ ಒಬ್ಬನಾಗಿ ಹೊರಹೊಮ್ಮಿದ್ದ. ಗುಜ್ಮಾನ್ ಹಾಗೂ ಜಾಂಬಾಡಾ ಪ್ರಸ್ತುತ ಅಮೆರಿಕಾದಲ್ಲಿ ಶಿಕ್ಷೆ ಅನುಭವಿಸುತ್ತಿದ್ದಾರೆ.
ಮೆಕ್ಸಿಕೋದ ಸೈನಿಕ ಗುಪ್ತಚರ ಮಾಹಿತಿಯ ಜೊತೆಗೆ ಅಮೆರಿಕಾದ ಅಧಿಕಾರಿಗಳಿಂದ ಬಂದ ಪೂರಕ ಮಾಹಿತಿಯ ಆಧಾರದಲ್ಲಿ ಈ ದಾಳಿ ನಡೆಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಒಸೆಗುರಾ ಸೇರಿದಂತೆ ಆರು ಶಂಕಿತ ಕಾರ್ಟೆಲ್ ಸದಸ್ಯರು ಸಾವನ್ನಪ್ಪಿದ್ದು, ಮೂವರು ಸೈನಿಕರು ಗಾಯಗೊಂಡಿದ್ದಾರೆ.
ಕಾರ್ಯಾಚರಣೆಯ ನಂತರ ಜಲಿಸ್ಕೊ, ಮೈಕೋಕಾನ್ ಮತ್ತು ಗ್ವಾನಾಹುವಾಟೊ ಸೇರಿದಂತೆ ಕನಿಷ್ಠ ಐದು ರಾಜ್ಯಗಳಲ್ಲಿ ಹಿಂಸಾಚಾರ ಭುಗಿಲೆದ್ದಿದೆ. ಶಂಕಿತ ಕಾರ್ಟೆಲ್ ಸದಸ್ಯರು ಬಸ್ಗಳು ಹಾಗೂ ಅಂಗಡಿಗಳಿಗೆ ಬೆಂಕಿ ಹಚ್ಚಿ, ರಸ್ತೆಗಳನ್ನು ತಡೆದು ಭದ್ರತಾ ಪಡೆಗಳೊಂದಿಗೆ ಘರ್ಷಣೆ ನಡೆಸಿದ್ದಾರೆ. ಪ್ರವಾಸಿ ತಾಣವಾದ ಪೋರ್ಟೊ ವಲ್ಲರ್ಟಾದಲ್ಲಿ ಬೆಂಕಿ ಹಾಗೂ ಹೊಗೆಯ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಇದರ ಪರಿಣಾಮವಾಗಿ, ಈ ಬೇಸಿಗೆಯಲ್ಲಿ ನಾಲ್ಕು ವಿಶ್ವಕಪ್ ಪಂದ್ಯಗಳನ್ನು ಆಯೋಜಿಸಲು ಸಜ್ಜಾಗಿರುವ ಜಲಿಸ್ಕೊ ರಾಜ್ಯದಲ್ಲಿ ಭಾನುವಾರದಂದು ಜನಸಂದಣಿ ಇರುವ ಎಲ್ಲಾ ಕಾರ್ಯಕ್ರಮಗಳನ್ನು ರದ್ದುಗೊಳಿಸಲಾಗಿದ್ದು, ಸೋಮವಾರದ ವೈಯಕ್ತಿಕ ತರಗತಿಗಳನ್ನೂ ಸ್ಥಗಿತಗೊಳಿಸಲಾಗಿದೆ. ಪರಿಸ್ಥಿತಿ ಹದಗೆಟ್ಟ ಹಿನ್ನೆಲೆಯಲ್ಲಿ ಏರ್ ಕೆನಡಾ ವಿಮಾನ ಸೇವೆಗಳನ್ನೂ ರದ್ದುಗೊಳಿಸಲಾಗಿದೆ ಎಂದು ತಿಳಿದುಬಂದಿದೆ.
