ವಾಷಿಂಗ್ಟನ್, ಮಾರ್ಚ್ 5: ಇರಾನ್ ಹಾಗೂ ಅಮೆರಿಕ–ಇಸ್ರೇಲ್ ನಡುವಿನ ಸಂಘರ್ಷ ಭೀಕರ ಸ್ವರೂಪ ಪಡೆದುಕೊಳ್ಳುತ್ತಿರುವ ಬೆನ್ನಲ್ಲೇ, ಅಮೆರಿಕ ತನ್ನ ಅತ್ಯಂತ ಶಕ್ತಿಶಾಲಿ ಅಂತರಖಂಡೀಯ ಕ್ಷಿಪಣಿ (ICBM) ‘ಮಿನಿಟ್ಮನ್–III’ ಅನ್ನು ಯಶಸ್ವಿಯಾಗಿ ಪರೀಕ್ಷಿಸಿದೆ. ‘ಡೂಮ್ಸ್ಡೇ’ ಅಥವಾ ‘ಪ್ರಳಯದ ಕ್ಷಿಪಣಿ’ ಎಂದೇ ಕರೆಯಲಾಗುವ ಈ ಅಣ್ವಸ್ತ್ರ ಸಾಮರ್ಥ್ಯದ ಕ್ಷಿಪಣಿ ಪರೀಕ್ಷೆ ಜಾಗತಿಕ ಮಟ್ಟದಲ್ಲಿ ಸಂಚಲನ ಮೂಡಿಸಿದೆ.
ಕ್ಯಾಲಿಫೋರ್ನಿಯಾದ ವ್ಯಾಂಡೆನ್ಬರ್ಗ್ ಸ್ಪೇಸ್ ಫೋರ್ಸ್ ಬೇಸ್ನಿಂದ ಮಾರ್ಚ್ 3ರಂದು ರಾತ್ರಿ 11:01ಕ್ಕೆ ಈ ಕ್ಷಿಪಣಿಯನ್ನು ಉಡಾವಣೆ ಮಾಡಲಾಗಿದೆ. ಸುಮಾರು 6,700 ಕಿಲೋಮೀಟರ್ ದೂರದ ಪೆಸಿಫಿಕ್ ಸಾಗರದಲ್ಲಿನ ಗುರಿಯನ್ನು ಇದು ನಿಖರವಾಗಿ ತಲುಪಿದೆ ಎಂದು ಅಮೆರಿಕ ಸೇನಾ ಅಧಿಕಾರಿಗಳು ತಿಳಿಸಿದ್ದಾರೆ.
ಫೆಬ್ರವರಿ 28ರಿಂದ ಆರಂಭವಾದ ‘ಆಪರೇಷನ್ ಎಪಿಕ್ ಫ್ಯೂರಿ’ ಕಾರ್ಯಾಚರಣೆಯಡಿ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನ ಪರಮಾಣು ಹಾಗೂ ಸೈನಿಕ ನೆಲೆಗಳ ಮೇಲೆ ದಾಳಿ ನಡೆಸುತ್ತಿವೆ. ಈ ಉದ್ವಿಗ್ನ ಪರಿಸ್ಥಿತಿಯ ನಡುವೆಯೇ ನಡೆದ ಈ ಕ್ಷಿಪಣಿ ಪರೀಕ್ಷೆಯನ್ನು ಶತ್ರು ರಾಷ್ಟ್ರಗಳಿಗೆ ನೇರ ಸಂದೇಶವೆಂದು ಪರಿಗಣಿಸಲಾಗಿದೆ.
ಮಿನಿಟ್ಮನ್–III ಕ್ಷಿಪಣಿ ಹಿರೋಷಿಮಾ ಮೇಲೆ ಬೀಸಿದ ಅಣುಬಾಂಬ್ಗಿಂತ ಸುಮಾರು 20 ಪಟ್ಟು ಹೆಚ್ಚು ಶಕ್ತಿಯ ಅಣ್ವಸ್ತ್ರಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿದೆ. ಇದು ಅಮೆರಿಕದ ಪರಮಾಣು ತ್ರಿವಳಿ (Nuclear Triad) ಶಕ್ತಿಯ ಪ್ರಮುಖ ಅಂಗವಾಗಿದೆ.
ಯುದ್ಧದಂತಹ ಸಂದರ್ಭದಲ್ಲಿಯೂ ಅಮೆರಿಕದ ಪರಮಾಣು ಪಡೆಗಳು ಸಂಪೂರ್ಣ ಸನ್ನದ್ಧವಾಗಿವೆ ಎಂಬುದನ್ನು ಈ ಪರೀಕ್ಷೆ ತೋರಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಜೊತೆಗೆ ಇರಾನ್ ಮಾತ್ರವಲ್ಲದೆ ರಷ್ಯಾ ಮತ್ತು ಚೀನಾದಂತಹ ರಾಷ್ಟ್ರಗಳಿಗೂ ಅಮೆರಿಕದ ಸೈನಿಕ ಸಾಮರ್ಥ್ಯದ ಬಗ್ಗೆ ಎಚ್ಚರಿಕೆ ನೀಡಿದಂತಾಗಿದೆ.
ಈ ಕ್ಷಿಪಣಿಯು ಎರಡು ‘ಟೆಸ್ಟ್ ರಿಯೆಂಟ್ರಿ ವೆಹಿಕಲ್’ಗಳನ್ನು ಹೊತ್ತೊಯ್ದು ತನ್ನ ನಿಖರತೆಯನ್ನು ಸಾಬೀತುಪಡಿಸಿದೆ ಎಂದು ಏರ್ ಫೋರ್ಸ್ ಗ್ಲೋಬಲ್ ಸ್ಟ್ರೈಕ್ ಕಮಾಂಡ್ ಮಾಹಿತಿ ನೀಡಿದೆ.
