ಬೆಂಗಳೂರು, ಫೆ.18: ರಾಜ್ಯದ ರಾಜಕಾರಣದಲ್ಲಿ ಇತ್ತೀಚೆಗೆ ಪ್ರಾಣಿಗಳ ಉಪಮಾನಗಳೇ ಹೆಚ್ಚು ಚರ್ಚೆಗೆ ಗ್ರಾಸವಾಗಿವೆ. ನಾಯಕರು ಪರಸ್ಪರ ವಾಗ್ವಾದ ನಡೆಸುವ ವೇಳೆ “ಬೀದಿ ನಾಯಿ”, “ಸಾಕು ನಾಯಿ” ಎಂಬ ಪದಗಳನ್ನು ಬಳಸುತ್ತಿರುವುದು ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ಇರುವ ಎರಡು ರೀತಿಯ ನಾಯಿಗಳ ನಿಷ್ಠೆಯನ್ನು ಹೋಲಿಕೆ ಮಾಡುವ ಮೂಲಕ ಆರೋಪ–ಪ್ರತ್ಯಾರೋಪಗಳು ನಡೆಯುತ್ತಿದ್ದು, “ನಾವು ಯಾವ ನಾಯಿ ಕಡೆಯವರು?” ಎಂಬ ಮಟ್ಟಿಗೆ ವಾಗ್ದಾಳಿ ತೀವ್ರಗೊಂಡಿದೆ. ರಾಜಕೀಯ ವೇದಿಕೆಗಳಲ್ಲಿ ಉಪಮಾನಗಳ ಯುದ್ಧವೇ ಸೃಷ್ಟಿಯಾಗಿರುವುದು ಗಮನಾರ್ಹವಾಗಿದೆ.
ಇನ್ನೊಂದೆಡೆ, ಒಬ್ಬ ನಾಯಕರು ತಮ್ಮನ್ನು “ದನ ಕಾಯುವವರ” ಸ್ಥಿತಿಗೆ ಹೋಲಿಸಿಕೊಂಡು ಅಸಮಾಧಾನ ವ್ಯಕ್ತಪಡಿಸಿದ್ದು, ಮತ್ತೊಬ್ಬರು “ನಾನು ಮಂಗ್ಯಾ ರೀತಿ ಆಗಿದ್ದೇನೆ” ಎಂದು ಅಳಲು ತೋಡಿಕೊಂಡಿದ್ದಾರೆ. ಈ ಹೇಳಿಕೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ವ್ಯಾಪಕ ಪ್ರತಿಕ್ರಿಯೆಗಳನ್ನು ಹುಟ್ಟಿಸಿವೆ.
ಒಟ್ಟಿನಲ್ಲಿ, ರಾಜಕೀಯ ಟೀಕೆ–ಟಿಪ್ಪಣಿಗಳಲ್ಲಿ ಪ್ರಾಣಿಗಳ ಹೆಸರನ್ನು ಅನಗತ್ಯವಾಗಿ ಬಳಸುತ್ತಿರುವುದರ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಅಸಮಾಧಾನ ವ್ಯಕ್ತವಾಗುತ್ತಿದೆ. ಪ್ರಾಣಿಗಳ ಕುರಿತ ಅವಮಾನಕಾರಿ ಹೇಳಿಕೆಗಳ ವಿರುದ್ಧ ಪ್ರಾಣಿ ದಯಾ ಸಂಘಟನೆಗಳು ಕೂಡ ಕಣಕ್ಕಿಳಿಯುವ ಸಾಧ್ಯತೆಯನ್ನು ತಳ್ಳಿಹಾಕಲಾಗುವುದಿಲ್ಲ. ರಾಜಕೀಯದಲ್ಲಿ ಮಾತಿನ ಮಿತಿಯ ಅಗತ್ಯತೆ ಕುರಿತು ಚರ್ಚೆಗಳು ಮತ್ತೆ ತೀವ್ರಗೊಳ್ಳುವ ಲಕ್ಷಣಗಳು ಕಾಣಿಸುತ್ತಿವೆ.
