ನವದೆಹಲಿ, ಜನವರಿ 15: ಸೇನಾ ದಿನದ ಅಂಗವಾಗಿ ಗುರುವಾರ ಭಾರತೀಯ ಸೇನೆಯು ಹೊಸ ವೀಡಿಯೊವನ್ನು ಬಿಡುಗಡೆ ಮಾಡಿದೆ. ಕಳೆದ ವರ್ಷ ಮೇ ತಿಂಗಳಲ್ಲಿ ನಡೆದ ಆಪರೇಷನ್ ಸಿಂಧೂರ್ ಸಂದರ್ಭದಲ್ಲಿ ಗಡಿಯಾಚೆಗಿನ ಭಯೋತ್ಪಾದಕ ಶಿಬಿರಗಳ ಮೇಲೆ ನಡೆಸಲಾದ ನಿಖರ ದಾಳಿಗಳು ಹಾಗೂ ಬಳಿಕ ಪಾಕಿಸ್ತಾನಿ ವಾಯುನೆಲೆಗಳು ಮತ್ತು ಅವುಗಳ ರಾಡಾರ್ ವ್ಯವಸ್ಥೆಗಳ ಮೇಲಿನ ದಾಳಿಗಳ ದೃಶ್ಯಗಳನ್ನು ಈ ವೀಡಿಯೊ ಒಳಗೊಂಡಿದೆ.
ಮೂರು ನಿಮಿಷಗಳ ಈ ವೀಡಿಯೊವು 2001ರ ಸಂಸತ್ತಿನ ಮೇಲಿನ ದಾಳಿ, 2002ರ ಅಕ್ಷರಧಾಮ ದೇವಾಲಯ ದಾಳಿ, 2008ರ ಮುಂಬೈ ದಾಳಿ, 2016ರ ಉರಿ, 2019ರ ಪುಲ್ವಾಮಾ ಹಾಗೂ 2025ರ ಪಹಲ್ಗಾಮ್ ಸೇರಿದಂತೆ ದೇಶವನ್ನು ಬೆಚ್ಚಿಬೀಳಿಸಿದ ಪ್ರಮುಖ ಭಯೋತ್ಪಾದಕ ಘಟನೆಗಳ ಸ್ಮರಣೆಯೊಂದಿಗೆ ಆರಂಭವಾಗುತ್ತದೆ.
ಮೇ 7, 2025ರ ರಾತ್ರಿ ಒಂಬತ್ತು ಭಯೋತ್ಪಾದಕ ಗುರಿಗಳ ಮೇಲೆ ಭಾರತೀಯ ಪಡೆಗಳು ಹೇಗೆ ಸಮನ್ವಯಿತ ದಾಳಿಗಳನ್ನು ನಡೆಸಿದವು ಎಂಬುದನ್ನು ವೀಡಿಯೊ ವಿವರವಾಗಿ ತೋರಿಸಿದೆ. ಆಪರೇಷನ್ ಸಿಂಧೂರ್ನ ಭಾಗವಾಗಿ ಕೈಗೊಳ್ಳಲಾದ ಈ ದಾಳಿಗಳ ದೃಶ್ಯಗಳು ಭಾರತೀಯ ಸೇನೆಯ ತಂತ್ರಜ್ಞಾನ ಮತ್ತು ಕಾರ್ಯಚಟುವಟಿಕೆ ಸಾಮರ್ಥ್ಯವನ್ನು ಎತ್ತಿ ಹಿಡಿಯುತ್ತವೆ.
ಪಾಕಿಸ್ತಾನವನ್ನು ನೇರವಾಗಿ ಹೆಸರಿಸದೆ, ಜಮ್ಮು ಮತ್ತು ಕಾಶ್ಮೀರದ ಗಡಿ ಪ್ರದೇಶಗಳ ಬಳಿ ನಡೆದ ಭಾರೀ ಶೆಲ್ ದಾಳಿಯ ನಂತರದ ಪರಿಣಾಮಗಳನ್ನು ಸಹ ವೀಡಿಯೊ ಒಳಗೊಂಡಿದೆ. ಜೊತೆಗೆ ಡ್ರೋನ್ಗಳನ್ನು ಹೊಡೆದುರುಳಿಸುವುದು ಹಾಗೂ ಮಿಲಿಟರಿ ಪೋಸ್ಟ್ಗಳನ್ನು ಗುರಿಯಾಗಿಸಿಕೊಂಡು ಭಾರತೀಯ ಪಡೆಗಳು ನಡೆಸಿದ ಪ್ರತೀಕಾರದ ದೃಶ್ಯಗಳು ದೇಶದ ರಕ್ಷಣಾ ಸಿದ್ಧತೆಯನ್ನು ಪ್ರತಿಬಿಂಬಿಸುತ್ತವೆ.
