ಬೆಂಗಳೂರು/ಮುಂಬೈ, ಜನವರಿ 31: ಸತತ ಏರಿಮುಖವಾಗಿ ಸಾಗುತ್ತಿದ್ದ ಚಿನ್ನ–ಬೆಳ್ಳಿಯ ದರಗಳು (Gold and Silver Price) ಕಳೆದ ಎರಡು ದಿನಗಳಲ್ಲಿ ಅಚ್ಚರಿಯ ಕುಸಿತ ಕಂಡಿವೆ. ಕೇಂದ್ರ ಬಜೆಟ್–2026ಕ್ಕೂ ಮುನ್ನವೇ ಅಮೂಲ್ಯ ಲೋಹಗಳ ಬೆಲೆಯಲ್ಲಿ ಭಾರೀ ಇಳಿಕೆ ದಾಖಲಾಗಿದ್ದು, ಚಿನ್ನ ಹಾಗೂ ಬೆಳ್ಳಿಯ ದರ ಇಳಿಕೆಯಿಂದ ಮಾರುಕಟ್ಟೆಯಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
ಕಳೆದ ಎರಡು ದಿನಗಳಲ್ಲಿ ಚಿನ್ನದ ಬೆಲೆ 10 ಗ್ರಾಂಗೆ ಸುಮಾರು 1.5 ಲಕ್ಷ ರೂ. ಮಟ್ಟಕ್ಕೆ ಕುಸಿದಿದ್ದರೆ, ಕೆಜಿ ಬೆಳ್ಳಿಯ ದರ 4 ಲಕ್ಷ ರೂ.ಗಳಿಂದ ನೇರವಾಗಿ 3 ಲಕ್ಷ ರೂ.ಗಳಿಗೆ ಇಳಿಕೆಯಾಗಿದೆ. ಇದರಿಂದ ವ್ಯಾಪಾರಿಗಳಿಗೆ ನಿರಾಸೆ ಉಂಟಾದರೂ, ಚಿನ್ನ–ಬೆಳ್ಳಿ ಖರೀದಿಗೆ ಕಾಯುತ್ತಿದ್ದ ಗ್ರಾಹಕರಲ್ಲಿ ಸಂತಸ ಮೂಡಿದೆ.
ಎರಡು ದಿನಗಳ ಹಿಂದೆ 4 ಲಕ್ಷ ರೂ. ಇದ್ದ ಕೆಜಿ ಬೆಳ್ಳಿಯ ಬೆಲೆ, ಜನವರಿ 31ರಂದು (ಇಂದು) ಶೇಕಡಾ 30ರಷ್ಟು ಕುಸಿತ ಕಂಡು 3 ಲಕ್ಷ ರೂ.ಗಳಿಗೆ ತಲುಪಿದೆ. ಮತ್ತೊಂದೆಡೆ, ಇತ್ತೀಚೆಗೆ 10 ಗ್ರಾಂಗೆ 1.93 ಲಕ್ಷ ರೂ.ವರೆಗೆ ಏರಿ ಸಾರ್ವಕಾಲಿಕ ದಾಖಲೆ ಬರೆದಿದ್ದ ಚಿನ್ನದ ದರ, ಇಂದು 10 ಗ್ರಾಂಗೆ 1,50,849 ರೂ.ಗಳಿಗೆ ಇಳಿಕೆಯಾಗಿದೆ.
ಈ ದರಗಳಲ್ಲಿ ಜಿಎಸ್ಟಿ ಹಾಗೂ ಮೇಕಿಂಗ್ ಶುಲ್ಕಗಳನ್ನು ಒಳಗೊಂಡಿಲ್ಲ ಎಂದು ವ್ಯಾಪಾರಿಗಳು ಸ್ಪಷ್ಟಪಡಿಸಿದ್ದಾರೆ. ಮುಂದಿನ ದಿನಗಳಲ್ಲಿ ಬಜೆಟ್ ಘೋಷಣೆ ಹಾಗೂ ಅಂತರರಾಷ್ಟ್ರೀಯ ಮಾರುಕಟ್ಟೆಯ ಚಲನಾವಲನಗಳು ಚಿನ್ನ–ಬೆಳ್ಳಿಯ ದರದ ಮೇಲೆ ಮಹತ್ವದ ಪ್ರಭಾವ ಬೀರುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
