ನವದೆಹಲಿ, ಫೆಬ್ರವರಿ 27: 2025ರ ದೆಹಲಿ ವಿಧಾನಸಭೆ ಚುನಾವಣೆಯಲ್ಲಿ Aam Aadmi Party (ಆಪ್)ಗೆ ಭಾರೀ ಹಿನ್ನಡೆಯಾಗಲು ಕಾರಣವೆಂದು ಹೇಳಲಾಗುತ್ತಿದ್ದ ಮದ್ಯ ನೀತಿ ಹಗರಣ ಪ್ರಕರಣಕ್ಕೆ ಮಹತ್ವದ ತಿರುವು ಸಿಕ್ಕಿದೆ. ಪ್ರಕರಣದಲ್ಲಿ ಮಾಜಿ ಮುಖ್ಯಮಂತ್ರಿ Arvind Kejriwal, ಮಾಜಿ ಉಪಮುಖ್ಯಮಂತ್ರಿ Manish Sisodia ಸೇರಿದಂತೆ ಒಟ್ಟು 23 ಆರೋಪಿಗಳನ್ನು ದೆಹಲಿ ನ್ಯಾಯಾಲಯ ಸಂಪೂರ್ಣ ಖುಲಾಸೆಗೊಳಿಸಿದೆ. ಪ್ರಕರಣವನ್ನು ತನಿಖೆ ನಡೆಸಿದ್ದ Central Bureau of Investigation (ಸಿಬಿಐ) ವಿರುದ್ಧ ನ್ಯಾಯಾಲಯ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ.
“23 ಆರೋಪಿಗಳ ಪೈಕಿ ಯಾರ ವಿರುದ್ಧವೂ ಪ್ರಾಥಮಿಕವಾಗಿ ಪ್ರಕರಣವೇ ಸಾಬೀತಾಗಿಲ್ಲ. ಸಿಬಿಐ ಕೇವಲ ಊಹೆಗಳ ಆಧಾರದ ಮೇಲೆ ಗಂಭೀರ ಆರೋಪ ಹೊರಿಸಿದೆ. ಇದು ತನಿಖಾ ಸಂಸ್ಥೆಯೇ ಹೆಣೆದಿರುವ ಪಿತೂರಿಯಂತಿದೆ,” ಎಂದು ನ್ಯಾಯಾಧೀಶರು ಕಟುವಾಗಿ ಅಭಿಪ್ರಾಯಪಟ್ಟರು. ಸಾಕ್ಷ್ಯಾಧಾರಗಳ ಕೊರತೆ, ಆರೋಪಪಟ್ಟಿಯಲ್ಲಿ ಸ್ಪಷ್ಟತೆಯ ಅಭಾವ ಹಾಗೂ ತನಿಖಾ ಕ್ರಮಗಳ ಬಗ್ಗೆ ನ್ಯಾಯಾಲಯ ಗಂಭೀರ ಪ್ರಶ್ನೆ ಎತ್ತಿದೆ.
ತೀರ್ಪು ಪ್ರಕಟವಾದ ತಕ್ಷಣ ಮಾಧ್ಯಮಗಳೆದುರು ಮಾತನಾಡಿದ ಅರವಿಂದ್ ಕೇಜ್ರಿವಾಲ್ ಭಾವುಕರಾದರು. “ಇದು ಸುದೀರ್ಘ ಯುದ್ಧದ ಜಯ. ಸತ್ಯ ಅಂತಿಮವಾಗಿ ಜಯಶಾಲಿಯಾಗುತ್ತದೆ ಎಂದು ನಾವು ಯಾವಾಗಲೂ ನಂಬಿದ್ದೇವೆ. ಭಾರತೀಯ ನ್ಯಾಯ ವ್ಯವಸ್ಥೆಯ ಮೇಲೆ ನಮಗೆ ಸಂಪೂರ್ಣ ನಂಬಿಕೆ ಇದೆ,” ಎಂದು ಹೇಳಿದರು.
ತಮ್ಮನ್ನು “ಖಟ್ಟರ್ ಪ್ರಾಮಾಣಿಕ” ಎಂದು ಕರೆಯಿಸಿಕೊಂಡ ಕೇಜ್ರಿವಾಲ್, ಈ ಪ್ರಕರಣ ರಾಜಕೀಯ ಪಿತೂರಿಯ ಭಾಗವಾಗಿತ್ತು ಎಂದು ಆರೋಪಿಸಿದರು.
“ನಮ್ಮ ಪಕ್ಷದ ಐದು ಪ್ರಮುಖ ನಾಯಕರನ್ನು ಜೈಲಿಗೆ ಹಾಕಲಾಯಿತು. ಹಾಲಿ ಸಿಎಂ ಅವರನ್ನು ಮನೆಯಿಂದ ಹೊರಗೆಳೆದು ಬಂಧಿಸಲಾಯಿತು. ಇಂದು ನ್ಯಾಯಾಲಯವೇ ನಮ್ಮ ಪ್ರಾಮಾಣಿಕತೆಯನ್ನು ಸಾಬೀತುಪಡಿಸಿದೆ,” ಎಂದು ಹೇಳಿದರು.
2023ರಲ್ಲಿ ಮದ್ಯ ನೀತಿ ಹಗರಣಕ್ಕೆ ಸಂಬಂಧಿಸಿದಂತೆ ಮನೀಶ್ ಸಿಸೋಡಿಯಾ ಬಂಧನಕ್ಕೊಳಗಾಗಿದ್ದರು. ಬಳಿಕ ಅರವಿಂದ್ ಕೇಜ್ರಿವಾಲ್ ಅವರ ಮೇಲೂ ಪ್ರಕರಣ ದಾಖಲಾಗಿತ್ತು. ಈಗ ಇಬ್ಬರೂ ಬಂಧಮುಕ್ತರಾಗಿದ್ದಾರೆ. ಮಾಧ್ಯಮಗಳ ಮುಂದೆ ಕೇಜ್ರಿವಾಲ್ ಕಣ್ಣೀರು ಹಾಕಿದಾಗ, ಮನೀಶ್ ಸಿಸೋಡಿಯಾ ತಮ್ಮ ನಾಯಕನನ್ನು ಸಮಾಧಾನಪಡಿಸಿದ ದೃಶ್ಯ ಗಮನ ಸೆಳೆಯಿತು.
ಈ ತೀರ್ಪು ದೆಹಲಿ ಹಾಗೂ ರಾಷ್ಟ್ರ ರಾಜಕೀಯದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗುವ ಸಾಧ್ಯತೆ ಇದೆ. ಆಪ್ ಪಕ್ಷದ ಭವಿಷ್ಯ ಮತ್ತು ಮುಂದಿನ ಚುನಾವಣಾ ರಾಜಕಾರಣದ ಮೇಲೆ ಇದರ ಪರಿಣಾಮ ಏನಾಗಬಹುದು ಎಂಬುದರ ಬಗ್ಗೆ ರಾಜಕೀಯ ವಲಯದಲ್ಲಿ ಕುತೂಹಲ ಹೆಚ್ಚಾಗಿದೆ.
