ಬೀದರ್, ಜ.17: ಬೀದರ್ ಜಿಲ್ಲಾಡಳಿತ ಹಾಗೂ ಭಾರತೀಯ ವಾಯುಪಡೆಯ ಸಹಯೋಗದಲ್ಲಿ ಬಹಮನಿ ಸುಲ್ತಾನರ ಕೋಟೆ ಆವರಣದಲ್ಲಿ ಇಂದು ಭವ್ಯ ಏರ್ ಶೋ ಕಾರ್ಯಕ್ರಮ ನಡೆಯಿತು. ಶಾಲಾ–ಕಾಲೇಜು ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಸಾವಿರಾರು ಸಂಖ್ಯೆಯಲ್ಲಿ ಸೇರಿ ವಿಮಾನಗಳ ಆಕರ್ಷಕ ಕಸರತ್ತುಗಳನ್ನು ಕಣ್ತುಂಬಿಕೊಂಡು ಸಂಭ್ರಮಿಸಿದರು.
ಭಾರತೀಯ ವಾಯುಪಡೆಯ ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡದ ಒಂಬತ್ತು ವಿಮಾನಗಳು ಒಂದರ ಹಿಂದೆ ಒಂದಾಗಿ ಆಕಾಶದಲ್ಲಿ ಮನಮೋಹಕ ಪ್ರದರ್ಶನ ನೀಡಿದವು. ಮೇಲಿನಿಂದ ಕೆಳಗೆ ಪರಸ್ಪರ ಎದುರುಗೊಳ್ಳುವ ಕ್ರಾಸಿಂಗ್, ಬ್ಯಾರಲ್ ರೋಲ್, ಹಾರ್ಟ್ ಆಕಾರ, ತಿರಂಗಾ ಚಿತ್ತಾರ ಸೇರಿದಂತೆ ವಿವಿಧ ಸಾಹಸ ಪ್ರದರ್ಶನಗಳು ಜನರ ಕಣ್ಮನ ಸೆಳೆದವು.
ಕೋಟೆ ಆವರಣದಲ್ಲಿ ನೆರೆದಿದ್ದ ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಕೇಕೆ ಹಾಕಿ ಹರ್ಷ ವ್ಯಕ್ತಪಡಿಸಿದರು. ಬಾನಲ್ಲಿ ಚಿತ್ತಾರ ಮೂಡಿಸಿದ ಸೂರ್ಯಕಿರಣ್ ವಿಮಾನಗಳನ್ನು ನೋಡಿ ಬೀದರ್ ಜನತೆ ಮಂತ್ರಮುಗ್ಧರಾಗಿ, ಏರ್ ಶೋವನ್ನು ಸಂಭ್ರಮದಿಂದ ಅನುಭವಿಸಿದರು.
