ನವದೆಹಲಿ: ಭಾರತ–ಬಾಂಗ್ಲಾದೇಶ ಗಡಿ ಭದ್ರತೆಯನ್ನು ಮತ್ತಷ್ಟು ಬಲಪಡಿಸಲು ಗಡಿ ಭದ್ರತಾ ಪಡೆ (BSF) ಒಂದು ವಿಶಿಷ್ಟ ಹಾಗೂ ಸಾಹಸಮಯ ಯೋಜನೆ ರೂಪಿಸಲು ಮುಂದಾಗಿದೆ. ಅಕ್ರಮ ನುಸುಳುವಿಕೆ ಮತ್ತು ಕಳ್ಳಸಾಗಣೆಯನ್ನು ತಡೆಯುವ ಉದ್ದೇಶದಿಂದ, ಗಡಿಯ ದುರ್ಗಮ ಪ್ರದೇಶಗಳಲ್ಲಿ ಹಾವು ಮತ್ತು ಮೊಸಳೆಗಳಂತಹ ವನ್ಯಜೀವಿಗಳನ್ನು ಬಳಸುವ ಸಾಧ್ಯತೆ ಕುರಿತು ಗಂಭೀರ ಚರ್ಚೆಗಳು ನಡೆಯುತ್ತಿವೆ.
ಪಶ್ಚಿಮ ಬಂಗಾಳದ ಸುಂದರಬನ ಪ್ರದೇಶ ಹಾಗೂ ಸುತ್ತಮುತ್ತಲಿನ ನದಿ ಮಾರ್ಗಗಳಲ್ಲಿ ಗಸ್ತು ಕಾಯುವುದು ಭದ್ರತಾ ಪಡೆಗಳಿಗೆ ಸವಾಲಾಗಿದ್ದು, ದಟ್ಟ ಕಾಡು ಮತ್ತು ಜೌಗು ಪ್ರದೇಶಗಳು ನುಸುಳುಕೋರರಿಗೆ ಅನುಕೂಲಕರವಾಗಿವೆ. ಈ ಹಿನ್ನೆಲೆ, ನದಿ ಮಾರ್ಗಗಳಲ್ಲಿ ಮೊಸಳೆಗಳನ್ನು ಮತ್ತು ಭೂಮಿಯ ಪೊದೆಗಳಲ್ಲಿ ವಿಷಕಾರಿ ಹಾವುಗಳನ್ನು ಬಳಸುವ ಆಲೋಚನೆ ಮುಂದಿಟ್ಟಲಾಗಿದೆ.
ಸಾಮಾನ್ಯವಾಗಿ ಗಡಿಗಳಲ್ಲಿ ತಂತಿ ಬೇಲಿ ಮತ್ತು ಸೈನಿಕರ ಗಸ್ತು ಇರುತ್ತದೆ. ಆದರೆ ನದಿ ಹಾಗೂ ಜೌಗು ಪ್ರದೇಶಗಳಲ್ಲಿ ತಂತಿ ಬೇಲಿ ಅಳವಡಿಸುವುದು ಅಸಾಧ್ಯ. ಇಂತಹ ಪ್ರದೇಶಗಳಲ್ಲಿ ನೈಸರ್ಗಿಕ ಅಡೆತಡೆಗಳಾಗಿ ಈ ಪ್ರಾಣಿಗಳನ್ನು ಬಳಸುವುದರಿಂದ ನುಸುಳುಕೋರರಲ್ಲಿ ಭಯ ಹುಟ್ಟಿಸಿ, ಅಕ್ರಮ ಪ್ರವೇಶವನ್ನು ತಡೆಯಬಹುದು ಎಂಬುದು ಅಧಿಕಾರಿಗಳ ಅಭಿಪ್ರಾಯ.
ಇದರ ಜೊತೆಗೆ, ಈ ಯೋಜನೆಯಿಂದ ಸ್ಥಳೀಯ ಪರಿಸರ ವ್ಯವಸ್ಥೆಯ ಸಮತೋಲನಕ್ಕೂ ಸಹಕಾರ ಸಿಗಬಹುದು ಎಂದು ತಿಳಿಸಲಾಗಿದೆ. ಯೋಜನೆ ಜಾರಿಗೆ ತರುವ ಮೊದಲು ತಜ್ಞರ ಸಲಹೆ, ಪರಿಸರ ಇಲಾಖೆಯ ಅನುಮತಿ ಹಾಗೂ ಪ್ರಾಣಿಗಳ ಸುರಕ್ಷತೆ ಕುರಿತು ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತದೆ.
ಈ ಹೊಸ ಪ್ರಯೋಗ ಯಶಸ್ವಿಯಾದರೆ, ತಾಂತ್ರಿಕ ಸಾಧನಗಳ ಜೊತೆಗೆ ಪ್ರಕೃತಿಯ ಸಹಕಾರದಿಂದ ದೇಶದ ಗಡಿ ಭದ್ರತೆಯನ್ನು ಇನ್ನಷ್ಟು ಬಲಪಡಿಸುವ ಸಾಧ್ಯತೆ ಇದೆ ಎಂದು ಬಿಎಸ್ಎಫ್ ನಿರೀಕ್ಷಿಸಿದೆ.
