ಬೆಂಗಳೂರು:ತೆಲುಗಿನ ‘ಬೇಬಿ’ ಹಾಗೂ ಕನ್ನಡದ ‘ಕೃಷ್ಣ’ ಸಿನಿಮಾದ ಕಥಾ ಎಳೆಗಳನ್ನು ಆಧಾರವಾಗಿ ತೆಗೆದುಕೊಂಡು, ತಮ್ಮದೇ ಆದ ಕಥನವನ್ನು ಬೆರೆಸಿ ನಿರ್ದೇಶಕ ಅನಿಲ್ ಕುಮಾರ್ ‘ಕಲ್ಟ್’ ಸಿನಿಮಾವನ್ನು ತೆರೆಗೆ ತಂದಿದ್ದಾರೆ. ‘ಬನಾರಸ್’ ಸಿನಿಮಾದಲ್ಲಿ ಚಾಕೋಲೆಟ್ ಬಾಯ್ ಆಗಿ ಕಾಣಿಸಿಕೊಂಡಿದ್ದ ಝೈದ್ ಖಾನ್, ಈ ಬಾರಿ ಸಂಪೂರ್ಣ ಭಿನ್ನವಾದ ಮಾಸ್ ಅವತಾರದಲ್ಲಿ ಪ್ರೇಕ್ಷಕರ ಮುಂದೆ ನಿಂತಿದ್ದಾರೆ. ಈಗಾಗಲೇ ಪೋಸ್ಟರ್ಗಳಿಂದಲೇ ಕುತೂಹಲ ಮೂಡಿಸಿದ್ದ ‘ಕಲ್ಟ್’ ಇಂದು ರಾಜ್ಯಾದ್ಯಂತ ಬಿಡುಗಡೆಯಾಗಿದೆ.
ಈ ಸಿನಿಮಾದಲ್ಲಿ ಝೈದ್ ಖಾನ್ ಜೊತೆಗೆ ರಚಿತಾ ರಾಮ್ ಹಾಗೂ ಮಲೈಕಾ ವಸುಪಾಲ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಅನಿಲ್ ಕುಮಾರ್ ನಿರ್ದೇಶನದ ಈ ಚಿತ್ರ ಪ್ರೀತಿಯಲ್ಲಿ ಸೋತ ಯುವಕನ ಭಾವನಾತ್ಮಕ ಪಯಣವನ್ನು ಹೇಳುತ್ತದೆ.
ಕಥಾವಸ್ತು
‘ಕಲ್ಟ್’ ಒಂದು ಅಪ್ಪಟ ಪ್ರೇಮಕಥೆ. ಲವ್ ಫೇಲ್ಯೂರ್ ಆದ ಯುವಕನೊಬ್ಬ ಹೇಗೆ ದುಃಖಕ್ಕೆ ಒಳಗಾಗುತ್ತಾನೆ, ಆ ನೋವು ಅವನ ಬದುಕಿನಲ್ಲಿ ಯಾವ ರೀತಿಯ ಏರಿಳಿತಗಳನ್ನು ತರುತ್ತದೆ ಎಂಬುದೇ ಚಿತ್ರದ ಕೇಂದ್ರಬಿಂದು. ಇಂಜಿನಿಯರಿಂಗ್ ಓದುತ್ತಿದ್ದ ಮಾಧವ ಅಲಿಯಾಸ್ ಮ್ಯಾಡಿ, ಪ್ರೀತಿಯ ವೈಫಲ್ಯದ ಕಾರಣದಿಂದ ಓದನ್ನು ಅರ್ಧಕ್ಕೆ ಬಿಟ್ಟು ಕುಡಿತಕ್ಕೆ ದಾಸನಾಗುತ್ತಾನೆ. ಅವನ ಲವರ್ ಗೀತಾ (ಮಲೈಕಾ) ಬಿಟ್ಟು ಹೋಗಿರುವುದೇ ಇದಕ್ಕೆ ಕಾರಣ.
ಇಂತಹ ಸ್ಥಿತಿಯಲ್ಲಿ ಇತಿಹಾಸಿನಿ (ರಚಿತಾ ರಾಮ್) ಜೀವನಕ್ಕೆ ಎಂಟ್ರಿ ಕೊಡುತ್ತಾಳೆ. ಗೀತಾ ಯಾಕೆ ಮ್ಯಾಡಿಯನ್ನು ಬಿಟ್ಟು ಹೋಗುತ್ತಾಳೆ? ಮತ್ತೆ ಅವರಿಬ್ಬರೂ ಒಂದಾಗುತ್ತಾರಾ? ಮ್ಯಾಡಿಯ ಬದುಕಿನಲ್ಲಿ ಇತಿಹಾಸಿನಿಯ ಪಾತ್ರ ಏನು? ಎಂಬ ಪ್ರಶ್ನೆಗಳಿಗೆ ಉತ್ತರವೇ ಸಿನಿಮಾ ಕಥೆ.
ಅಭಿನಯ ಮತ್ತು ತಾಂತ್ರಿಕ ಅಂಶಗಳು
ಝೈದ್ ಖಾನ್ ಈ ಸಿನಿಮಾದಲ್ಲಿ ಮೂರು ಶೇಡ್ಗಳಲ್ಲಿ ಕಾಣಿಸಿಕೊಳ್ಳುತ್ತಾರೆ—ಕುಡಿತಕ್ಕೆ ಒಳಗಾದ ಮ್ಯಾಡಿ, ಮುಗ್ಧ ಮಾಧವ ಮತ್ತು ಈ ಇಬ್ಬರ ಸ್ವಭಾವಗಳ ಮಿಶ್ರಣ. ಮಾಧವ ಪಾತ್ರವನ್ನು ನಿರ್ದೇಶಕರು ಚೆನ್ನಾಗಿ ಕಟ್ಟಿಕೊಟ್ಟಿದ್ದಾರೆ. ಝೈದ್ ಖಾನ್ ಅಭಿನಯದಲ್ಲಿ ಪಕ್ವತೆ ಕಾಣಿಸುತ್ತದೆ. ಮಲೈಕಾ ವಸುಪಾಲ್ ತಮ್ಮ ಪಾತ್ರವನ್ನು ಸಮರ್ಪಕವಾಗಿ ನಿಭಾಯಿಸಿದ್ದು, ರಚಿತಾ ರಾಮ್ ಅವರ ಪಾತ್ರ ಪ್ರೇಕ್ಷಕರ ಗಮನ ಸೆಳೆಯುತ್ತದೆ.
ಅಂತಿಮ ಮಾತು
ಒಟ್ಟಾರೆ ‘ಕಲ್ಟ್’ ಕೇವಲ ಲವ್ ಸ್ಟೋರಿ ಅಲ್ಲ. ಬ್ರೇಕಪ್ ನೋವಿನಿಂದ ಹೊರಬರಲು ಹೋರಾಡುವ ಹೃದಯಗಳ ಕಥೆ. ಮೂವ್ ಆನ್ ಆಗುವುದು ಸುಲಭವಲ್ಲ ಎನ್ನುವವರಿಗೆ 2 ಗಂಟೆ 43 ನಿಮಿಷಗಳ ಈ ಸಿನಿಮಾ ಒಂದು ಇಮೋಷನಲ್ ರೈಡ್. ಕೆಲವೆಡೆ ದೃಶ್ಯಗಳು ಓವರ್ ಅನಿಸಬಹುದಾದರೂ, ಭಗ್ನ ಪ್ರೇಮಿಯ ಹೃದಯದ ಧ್ವನಿಯನ್ನು ಕೇಳಲು ಸಿದ್ಧರಾಗಿದ್ದರೆ ‘ಕಲ್ಟ್’ ನಿಮಗೆ ಕನೆಕ್ಟ್ ಆಗುವ ಸಿನಿಮಾ.
