ನವದೆಹಲಿ: ಚಂದ್ರಯಾನ-4 ಮಿಷನ್ಗಾಗಿ ಚಂದ್ರನ ದಕ್ಷಿಣ ಧ್ರುವದ ಸಮೀಪ ಲ್ಯಾಂಡಿಂಗ್ ಸ್ಥಳವನ್ನು ಇಸ್ರೋ (ISRO) ಗುರುತಿಸಿದೆ. ಚಂದ್ರಯಾನ-2 ಆರ್ಬಿಟರ್ನಿಂದ ಲಭ್ಯವಾದ ಉನ್ನತ ಗುಣಮಟ್ಟದ ಚಿತ್ರಗಳ ಆಧಾರದ ಮೇಲೆ, ವಿಜ್ಞಾನಿಗಳು ಮಾನ್ಸ್ ಮೌಟನ್ (ಎಂಎಂ-4) ಪ್ರದೇಶವನ್ನು ಅತ್ಯಂತ ಸೂಕ್ತ ಲ್ಯಾಂಡಿಂಗ್ ತಾಣವೆಂದು ಆಯ್ಕೆ ಮಾಡಿದ್ದಾರೆ.
ಮಾನ್ಸ್ ಮೌಟನ್ ಚಂದ್ರನ ದಕ್ಷಿಣ ಧ್ರುವದ ಬಳಿ ಇರುವ ಸುಮಾರು 6,000 ಮೀಟರ್ ಎತ್ತರದ ಪರ್ವತವಾಗಿದೆ. ಇದರ ಶಿಖರ ಬಹುಪಾಲು ಸಮತಟ್ಟಾಗಿರುವುದರಿಂದ ಲ್ಯಾಂಡಿಂಗ್ಗೆ ಅನುಕೂಲಕರವಾಗಿದೆ. ಆದರೆ, ಲ್ಯಾಂಡಿಂಗ್ನ ಅಂತಿಮ ತಾಣದ ಕುರಿತು ನಿರ್ಧಾರವನ್ನು ಉಡಾವಣೆಗೆ ಸಮೀಪದ ಹಂತದಲ್ಲಿ ಕೈಗೊಳ್ಳಲಾಗುತ್ತದೆ ಎಂದು ಇಸ್ರೋ ತಿಳಿಸಿದೆ.
ಚಂದ್ರನ ಮಾದರಿ-ರಿಟರ್ನ್ (Sample Return) ಮಿಷನ್ ಆಗಿ ವಿನ್ಯಾಸಗೊಳಿಸಲಾದ ಚಂದ್ರಯಾನ-4 ಯೋಜನೆಗೆ ಕೇಂದ್ರ ಸರ್ಕಾರ ಅನುಮೋದನೆ ನೀಡಿದ್ದು, ಇದು ಭಾರತದ ಇತಿಹಾಸದಲ್ಲೇ ಅತ್ಯಂತ ಸಂಕೀರ್ಣ ಚಂದ್ರ ಅನ್ವೇಷಣಾ ಪ್ರಯತ್ನವಾಗಿದೆ. ಈ ಮಿಷನ್ನ್ನು 2028ರೊಳಗೆ ಉಡಾವಣೆ ಮಾಡುವ ಗುರಿಯಿದೆ ಎಂದು ಇಸ್ರೋ ಅಧ್ಯಕ್ಷ ವಿ. ನಾರಾಯಣನ್ ಈ ಹಿಂದೆ ಹೇಳಿದ್ದರು.
ವಿಜ್ಞಾನಿಗಳ ಅಭಿಪ್ರಾಯದಂತೆ, ಮಾನ್ಸ್ ಮೌಟನ್ ಪ್ರದೇಶವು ದೀರ್ಘಾವಧಿಗೆ ಸೂರ್ಯನ ಬೆಳಕನ್ನು ಪಡೆಯುವ ಕಾರಣದಿಂದ ಮಹತ್ವ ಪಡೆದಿದೆ. ಜೊತೆಗೆ, ಇಲ್ಲಿ ನೀರಿನ ಮಂಜುಗಡ್ಡೆ ಇರುವ ಸಾಧ್ಯತೆಯೂ ಇದೆ ಎಂದು ಅಂದಾಜಿಸಲಾಗಿದೆ.
ಮಾಧ್ಯಮ ವರದಿಗಳ ಪ್ರಕಾರ, ಈ ಅಧ್ಯಯನವನ್ನು ಚಂದ್ರ ಮತ್ತು ಗ್ರಹ ವಿಜ್ಞಾನ ಸಮ್ಮೇಳನ (LPSC–2026)ದಲ್ಲಿ ಮಂಡಿಸಲಾಗಿದೆ. ಲ್ಯಾಂಡಿಂಗ್ ತಾಣ ಗುರುತಿಸಲು ಚಂದ್ರಯಾನ-2 ಆರ್ಬಿಟರ್ನಲ್ಲಿರುವ ಆರ್ಬಿಟರ್ ಹೈ ರೆಸಲ್ಯೂಷನ್ ಕ್ಯಾಮೆರಾ (OHRC)ಯಿಂದ ಪಡೆದ ಚಿತ್ರಗಳನ್ನು ಬಳಸಲಾಗಿದೆ. ಈ ಕ್ಯಾಮೆರಾ ಪ್ರತಿ ಪಿಕ್ಸೆಲ್ಗೆ ಸುಮಾರು 32 ಸೆಂಟಿಮೀಟರ್ ರೆಸಲ್ಯೂಷನ್ನಲ್ಲಿ ಚಂದ್ರನ ಮೇಲ್ಮೈಯನ್ನು ಚಿತ್ರಿಸುವ ಸಾಮರ್ಥ್ಯ ಹೊಂದಿದ್ದು, ಸಣ್ಣ ಕುಳಿಗಳು, ಬಂಡೆಗಳು, ಇಳಿಜಾರುಗಳು ಹಾಗೂ ಮೇಲ್ಮೈ ವಿನ್ಯಾಸಗಳನ್ನು ಸ್ಪಷ್ಟವಾಗಿ ಗುರುತಿಸಲು ಸಹಕಾರಿಯಾಗಿದೆ. ಇದರಿಂದ ಲ್ಯಾಂಡಿಂಗ್ಗೆ ಅಪಾಯಕಾರಿ ಪ್ರದೇಶಗಳನ್ನು ಮುಂಚಿತವಾಗಿಯೇ ಪತ್ತೆಹಚ್ಚಲು ಸಾಧ್ಯವಾಗಿದೆ.
