ಮುಂಬೈ : ಸಿಂಧೂ ನದಿ ನೀರು ಒಪ್ಪಂದಕ್ಕೆ ಸಂಬಂಧಿಸಿದಂತೆ ಭಾರತಕ್ಕೆ ಪಾಕಿಸ್ತಾನದ ಮಾಜಿ ವಿದೇಶಾಂಗ ಸಚಿವ ಬಿಲಾವಲ್ ಭುಟ್ಟೋ ಜರ್ದಾರಿ ನೀಡಿರುವ ಹೊಸ ಎಚ್ಚರಿಕೆಯನ್ನು ನಟ, ಭಾರತೀಯ ಜನತಾ ಪಕ್ಷದ ನಾಯಕ ಮಿಥುನ್ ಚಕ್ರವರ್ತಿ ಟೀಕಿಸಿದ್ದಾರೆ.
ಬಿಲಾವಲ್ ಭುಟ್ಟೋ ಅವರ ಯುದ್ಧ ಬೆದರಿಕೆಗೆ ಪ್ರತಿಕ್ರಿಯಿಸಿದ ಬಿಜೆಪಿ ನಾಯಕ ಮಿಥುನ್ ಚಕ್ರವರ್ತಿ, “ನಾವು ಒಂದು ಡ್ಯಾಮ್ ನಿರ್ಮಾಣ ಮಾಡಿ 140 ಕೋಟಿ ಜನರು ಆ ಅಣೆಕಟ್ಟಿನಲ್ಲಿ ಮೂತ್ರ ವಿಸರ್ಜಿಸುವ ಬಗ್ಗೆಯೂ ಯೋಚಿಸಿದ್ದೇವೆ. ಮೂತ್ರ ಮಾಡಿದ ನಂತರ, ನಾವು ಅಣೆಕಟ್ಟನ್ನು ತೆರೆಯುತ್ತೇವೆ, ಆಗ ಪಾಕಿಸ್ತಾನದಲ್ಲಿ ಸುನಾಮಿ ಬರುತ್ತದೆ” ಎಂದು ಅವರು ಹೇಳಿದರು.
ಕೋಲ್ಕತ್ತಾದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಮಿಥುನ್ ಚಕ್ರವರ್ತಿ, “ಅಗರ್ ಐಸಿ ಬಾತೇಂ ಕರ್ತೇ ರಹೇಂಗೆ ಔರ್ ಹುಮಾರಿ ಖೋಪ್ಡಿ ಸನಕ್ ಗಯಿ ತೋ ಫಿರ್ ಏಕ್ ಕೆ ಬಾದ್ ಏಕ್ ಬ್ರಹ್ಮೋಸ್ ಸವಾಲು (ಇಂತಹ ಹೇಳಿಕೆಗಳು ಮುಂದುವರಿದರೆ ಮತ್ತು ನಾವು ತಾಳ್ಮೆ ಕಳೆದುಕೊಂಡರೆ, ನಂತರ ಬ್ರಹ್ಮೋಸ್ ಕ್ಷಿಪಣಿಗಳು ಒಂದರ ಹಿಂದೆ ಒಂದರಂತೆ ಉಡಾವಣೆಯಾಗುತ್ತವೆ)” ಎಂದು ಹೇಳಿದರು.
ಪಾಕಿಸ್ತಾನದ ಜನರ ವಿರುದ್ಧ ನನಗೆ ಯಾವುದೇ ದ್ವೇಷವಿಲ್ಲ. ಇದನ್ನೆಲ್ಲ ನಾನು ಅವರ ಪರವಾಗಿ (ಬಿಲಾವಲ್ ಭುಟ್ಟೋ) ಹೇಳಿದ್ದೇನೆ” ಎಂದು ವ್ಯಂಗ್ಯವಾಡಿದರು. ಸಿಂಧ್ ಸರ್ಕಾರದ ಸಂಸ್ಕೃತಿ ಇಲಾಖೆ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ, ಪಾಕಿಸ್ತಾನದ ಮಾಜಿ ವಿದೇಶಾಂಗ ಸಚಿವ ಬಿಲಾವಲ್ ಭುಟ್ಟೋ ಜರ್ದಾರಿ, ಸಿಂಧೂ ನದಿಯ ನೀರನ್ನು ಪಾಕಿಸ್ತಾನದಿಂದ ಬೇರೆಡೆಗೆ ತಿರುಗಿಸುವುದು ದೇಶದ ಇತಿಹಾಸ, ಸಂಸ್ಕೃತಿ ಮತ್ತು ನಾಗರಿಕತೆಯ ಮೇಲಿನ ದಾಳಿಯಾಗಿದ್ದು, ಸಿಂಧ್ ಹೆಚ್ಚು ಪರಿಣಾಮ ಬೀರುತ್ತದೆ ಎಂದು ಆರೋಪಿಸಿದರು.
ಮತ್ತೊಂದು ಪ್ರತ್ಯೇಕ ಮತ್ತು ಅತ್ಯಂತ ಆತಂಕಕಾರಿ ಘಟನೆಯಲ್ಲಿ, ಫ್ಲೋರಿಡಾದ ಟ್ಯಾಂಪಾದಲ್ಲಿ ಖಾಸಗಿ ಭೋಜನ ಕೂಟದ ಸಂದರ್ಭದಲ್ಲಿ ಪಾಕಿಸ್ತಾನ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರು ಸಿಂಧೂ ನದಿ ನೀರು ಒಪ್ಪಂದದ ಬಗ್ಗೆ ನೇರ ಬೆದರಿಕೆ ಹಾಕಿದರು. ಒಪ್ಪಂದವನ್ನು ಅಮಾನತುಗೊಳಿಸುವುದನ್ನು ಮುಂದುವರಿಸಿದರೆ ಪಾಕಿಸ್ತಾನವು ಭಾರತದ ಅಣೆಕಟ್ಟುಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಲಿದೆ ಎಂದು ಮುನೀರ್ ಎಚ್ಚರಿಸಿದರು.
ಪಾಕಿಸ್ತಾನಿ ವಲಸೆಗಾರರನ್ನು ಉದ್ದೇಶಿಸಿ ಮಾತನಾಡಿದ ಮುನೀರ್, “ಭಾರತ ಅಣೆಕಟ್ಟು ನಿರ್ಮಿಸುವವರೆಗೆ ನಾವು ಕಾಯುತ್ತೇವೆ, ಮತ್ತು ಅದರ ಕಾಮಗಾರಿ ಮುಗಿದ ಕೂಡಲೆ, ನಾವು 10 ಕ್ಷಿಪಣಿಗಳನ್ನು ಹಾರಿಸುತ್ತೇವೆ ಎಂದು ಘೋಷಿಸಿದರು.
ಟ್ಯಾಂಪಾದಲ್ಲಿ ಪಾಕಿಸ್ತಾನದ ಗೌರವಾನ್ವಿತ ಕಾನ್ಸುಲ್ ಆಯೋಜಿಸಿದ್ದ ಬ್ಲ್ಯಾಕ್-ಟೈ ಕಾರ್ಯಕ್ರಮದಲ್ಲಿ ಈ ಹೇಳಿಕೆಗಳನ್ನು ನೀಡಲಾಯಿತು, ಇದರಲ್ಲಿ ಸುಮಾರು 120 ಡಯಾಸ್ಪೊರಾ ಸದಸ್ಯರು ಭಾಗವಹಿಸಿದ್ದರು. ಸಭೆಯಲ್ಲಿ ಫೋನ್ಗಳು ಮತ್ತು ಡಿಜಿಟಲ್ ಸಾಧನಗಳನ್ನು ನಿಷೇಧಿಸಲಾಗಿತ್ತು ಮತ್ತು ಯಾವುದೇ ಅಧಿಕೃತ ಪ್ರತಿಲಿಪಿ ಬಿಡುಗಡೆಯಾಗದಿದ್ದರೂ, ಹಲವಾರು ಪ್ರತ್ಯಕ್ಷದರ್ಶಿಗಳು ಮುನೀರ್ ಅವರ ಹೇಳಿಕೆಯ ವಿವರಗಳನ್ನು ಮಾಧ್ಯಮಗಳಿಗೆ ಒದಗಿಸಿದ್ದಾರೆ.
