ನವದೆಹಲಿ: ಭಾರತದ ಆರ್ಥಿಕತೆಯು ಜಗತ್ತಿನ ನಿರೀಕ್ಷೆಗಳನ್ನು ಮೀರಿಸಿ ದಾಖಲೆಮಟ್ಟದ GDP ಬೆಳವಣಿಗೆಯನ್ನು ಸಾಧಿಸಿದೆ. ಸರ್ಕಾರಿ ದತ್ತಾಂಶಗಳ ಪ್ರಕಾರ, ಜುಲೈ–ಸೆಪ್ಟೆಂಬರ್ 2025 ತ್ರೈಮಾಸಿಕದಲ್ಲಿ ದೇಶದ GDP 8.2% ರಷ್ಟು ಜಿಗಿತ ದಾಖಲಿಸಿದೆ. ಕಳೆದ ಆರು ತ್ರೈಮಾಸಿಕಗಳಲ್ಲಿಯೇ ಇದು ಅತ್ಯಧಿಕ ಬೆಳವಣಿಗೆ ಎಂದು ಆರ್ಥಿಕ ತಜ್ಞರು ಹೇಳಿದ್ದಾರೆ.
ಆಂತರಿಕ ಬಳಕೆ, ಕೈಗಾರಿಕಾ ಉತ್ಪಾದನೆ ಹಾಗೂ ಸೇವಾ ವಲಯದಲ್ಲಿ ಕಂಡುಬಂದ ಚೈತನ್ಯ ಆರ್ಥಿಕ ವೇಗವರ್ಧನೆಗೆ ಪ್ರಮುಖ ಕಾರಣವಾಗಿದೆ. ವಿಶೇಷವಾಗಿ ತಂತ್ರಜ್ಞಾನ, ಮೂಲಸೌಕರ್ಯ ಹೂಡಿಕೆ ಮತ್ತು ಉತ್ಪಾದನಾ ವಲಯದಲ್ಲಿ (Manufacturing Sector) ಸ್ಪಷ್ಟವಾದ ಏರುಗುರುತು ಕಂಡುಬಂದಿದೆ.
ಭಾರತದ ಈ ಸಾಧನೆ ಜಾಗತಿಕ ಮಟ್ಟದಲ್ಲೂ ಚರ್ಚೆಗೆ ಗ್ರಾಸವಾಗಿದೆ. ಹಲವು ರಾಷ್ಟ್ರಗಳು ಕುಸಿತದ ಚಿಹ್ನೆಗಳು ಕಾಣುತ್ತಿರುವ ಸಂದರ್ಭದಲ್ಲಿ ಭಾರತದ ಬಲಿಷ್ಠ ಆರ್ಥಿಕ ಸ್ಥಿರತೆ ಗಮನ ಸೆಳೆದಿದೆ. ಹಣಕಾಸು ಸಚಿವಾಲಯ ಬಿಡುಗಡೆ ಮಾಡಿದ ವರದಿ ಪ್ರಕಾರ, ಮುಂದಿನ ತ್ರೈಮಾಸಿಕದಲ್ಲೂ ಇದೇ ಗತಿ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
ತಜ್ಞರ ಅಭಿಪ್ರಾಯದಲ್ಲಿ, “ಉತ್ಪಾದನಾ ವಲಯದ ವೇಗ, ಹೂಡಿಕೆದಾರರ ವಿಶ್ವಾಸ ಮತ್ತು ಸರ್ಕಾರಿ ನೀತಿಗಳ ಪರಿಣಾಮವಾಗಿ ಭಾರತ ಮುಂದಿನ ವರ್ಷಗಳಲ್ಲಿ ಸಹ ಜಾಗತಿಕ ಆರ್ಥಿಕತೆಯನ್ನು ಮುನ್ನಡೆಸುವ ಪ್ರಮುಖ ರಾಷ್ಟ್ರವಾಗಲಿದೆ” ಎಂದು ಅಭಿಪ್ರಾಯ ವ್ಯಕ್ತವಾಗುತ್ತಿದೆ.
ಹಿಂದಿನ ತ್ರೈಮಾಸಿಕದ 7.8% ಮತ್ತು ಕಳೆದ ವರ್ಷದ ಇದೇ ಅವಧಿಯ 5.6% ದರಗಳಿಗಿಂತಲೂ ಈ ಬಾರಿ ಭಾರತದ ಜಿಡಿಪಿ ಇನ್ನಷ್ಟು ಬಲವಾಗಿ ಬೆಳೆಯುವ ಮೂಲಕ ಆರ್ಥಿಕ ಚಟುವಟಿಕೆಗಳು ಪುನರುಜ್ಜೀವನಗೊಂಡಿರುವುದು ಸ್ಪಷ್ಟವಾಗಿದೆ.
ಒಟ್ಟು ಜಿಡಿಪಿಯಲ್ಲಿನ ಪ್ರಮುಖ ವಲಯವಾದ ಉತ್ಪಾದನಾ ಕ್ಷೇತ್ರ ಈ ತ್ರೈಮಾಸಿಕದಲ್ಲಿ 9.1% ಏರಿಕೆಯಾಗಿ ಉತ್ತಮ ಪ್ರದರ್ಶನ ನೀಡಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಈ ವಲಯದ ಏರಿಕೆ ಕೇವಲ 2.2% ಆಗಿದ್ದನ್ನು ಗಮನಿಸಿದರೆ, ಈ ಬಾರಿ ಕಂಡ ಏರಿಕೆ ಗಣನೀಯವಾಗಿದೆ.
ಇತ್ತೀಚಿನ ದತ್ತಾಂಶಗಳ ಪ್ರಕಾರ, ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಭಾರತದ ನಾಮಮಾತ್ರ ಜಿಡಿಪಿ 8.7% ರಷ್ಟು ಬೆಳವಣಿಗೆ ಕಂಡಿದೆ.
ಈ ಕುರಿತು ಪ್ರತಿಕ್ರಿಯಿಸಿದ ಪ್ರಧಾನಮಂತ್ರಿ ನರೇಂದ್ರ ಮೋದಿ, “2025-26ರ ಎರಡನೇ ತ್ರೈಮಾಸಿಕದಲ್ಲಿ 8.2% ಜಿಡಿಪಿ ಬೆಳವಣಿಗೆ ದೇಶದ ಬೆಳವಣಿಗೆ ಪರ ನೀತಿಗಳು ಮತ್ತು ಸುಧಾರಣೆಗಳ ಪರಿಣಾಮ. ಇದು ನಮ್ಮ ಜನರ ಪರಿಶ್ರಮ ಮತ್ತು ಉದ್ಯಮಶೀಲತೆಯ ಪ್ರತಿಬಿಂಬ,” ಎಂದು ತಿಳಿಸಿದ್ದಾರೆ. ಸರ್ಕಾರ ಮುಂದುವರೆದು ಸುಧಾರಣಾ ಕ್ರಮಗಳ ಮೂಲಕ ನಾಗರಿಕರ ಜೀವನ ಸುಲಭತೆಯನ್ನು ಹೆಚ್ಚಿಸಲು ಬದ್ಧವಾಗಿದೆ ಎಂದೂ ಅವರು ಹೇಳಿದರು.
